Tere hote janam liya hota

                                 
                                             تیرے ہوتے جنم لیا ہوتا

                                       
مجھ سا نہ کویئی دوسرا ہوتا 

سانس لیتا تُو اور میں جی اُٹھتا
کاش مکہ کی میں فضا ہوتا

ہجرتوں میں پڑآو ہوتا میں
اور تو کچھ دیر کو رکا ہوتا

تیرے حُجرے کے آس پاس کہیں
میں کوئی کچا راستہ ہوتا

بیچ طائف وقت سنگ زنی
تیرے لب پہ سجی دعا ہوتا

کسی غزوہ میں زخمی ہو کر میں
تیرے قدموں میں جا گرا ہوتا

کاش اُحد میں شریک ہو سکتا میں
اور باقی نہ پھر بچا ہوتا

تیری کملی کا سوت کیوں نہ ہوا
تیرے شانوں پہ جھولتا ہوتا

چوب ہوتا میں تیرے چوکھٹ کی
یا تیرے ہاتھ کا عصا ہوتا

تیری پاکیزہ زندگی کا میں 

کوئی گمنام واقعہ ہوتا

لفظ ہوتا میں کسی آیت کا
جو تیرے ہونٹ سے ادا ہوتا

میں کوئی جنگجو عرب ہوتا
اور تیرے سامنے جھکا ہوتا

میں بھی ہوتا تیرا غلام کوئی
لاکھ کہتا نہ میں رہا ہوتا

چاند ہوتا میں تیرے زمانے کا
پھر تیرے حکم سے بٹا ہوتا

پانی ہوتا اداس چشموں کا
تیرے قدموں میں بہہ گیا ہوتا

پودہ ہوتامیں جلتے  صحرا  میں
اور تیرے ہاتھ سے لگا ہوتا

تیری صحبت مجھے مِلی ہوتی
میں بھی تب کتنا خوشنما ہوتا

مجھ پہ پڑتی جو تیری چشمِ کرم
آدمی کیا میں معجز ہ    ہوتا

ٹکرا ہو میں ایک بادل کا
اور تیرے ساتھ گھومتا ہوتا

آسمان ہوتا عہد نبوی کا
تجھ کو حیرت سے دیکھتا ہوتا

خاک ہوتامیں تیری گلیوں کی
اور تیرے پاؤں چومتا ہوتا

پیڑ ہوتا کھجور کا کوئی
جسکا پھل تونے کھا لیا ہوتا

بچہ ہوتا غریب بیوہ کا
سر تیری گودہ میں چھپا ہوتا

رستہ ہوتا تیرے گزرنے کا
اور تیرا رستہ دیکھتا ہوتا

بُت ہی ہوتا میں خانہ کعبہ میں
جو تیرے ہاتھ سے فنا ہوتا

مجھ کو خالق بناتا غار حَسَن
اور میرا نام بھی حِرَا ہوتا

[حَسَن نثار]